يَقُولُ الرَّسُولُ -صلى الله عليه وسلم- : ((لاَ يُؤمِنُ أََحدُكُم حتَّى يُحِبَّ لأَخِيهِ ما يُحِبُّ لِنَفْسِه)
فكرت اسوي موضوع لمساعدة كل عضو محتاج للاقلاع عن التدخين وباسهل الطرق لاني شخص مدخن من زمن ليس قريب وتركت التدخين في اقل من نصف ساعة بسبب صدمة تعرضت لها امامي وسبحان الله كانت خيرة ...
طبعا طحت في التدخين من ايام المدرسة وكنت اجاهد للحصول على الزقارة وكان الوضع طبيعي لان في وقتها الانسان مايفكر في المخاطر بعد فترة شباب وصحة ولا شي هامني وبعدها تعلقت في الزقارة وصرت مدمن حبيس لها لفترة تقارب ال20 سنة ضاعت من عمري كلها بسبب اعذار واهية
منها
ماقدر . راسي بيعورني . مااحلى طعم زقارة الريق . ما احلى زقارة بعد الاكل اعصب احرق زقاير انبسط احرق زقاير اطلع اتمشى انبسط احرق زقاير لي متى وانا احرق جسدي
ويوم ورا يوم لين ما لعبت في صحتي وجاني الضغط والامراض النفسية والقولون من غير الاضرار المادية والكل يعرفها .
لاكن للامانة مالقيت احد ياخذ بيدي او ينصحني والتسويف وفكرة اني بترك التدخين موجودة من اول مابديت التدخين لين ماعدت هالسنين وانا اقول بعدين وبكرة وماقدر وخرمان ....
لين ماشفت امامي موقف يا اخوان من هولة تركت التدخين مرة واحدة ولم اعد احس باي طعم لتدخين وكرهته لدرجة اني كل ماشفته رميته ...
الموقف هو
عندنا سائق خاص له مايقارب 25 سنه على كفالتنا والرجل مدخن بشراهه يدخن تقريبا 3 بكتات يوميا لمدة 45 سنة عمرة الان حول 60
في يوم من الايام قبل تقريبا الشهرين كلمنى جاري قال لي سواقكم قدام البيت يقوم ويطيح قلت ليش قال مادري رح شوف وش فيه المهم نزلت لرجل لقيته على الرصيف اقول وش فيك قال مافيني شي بس وين الغرفة حقتي ماشوفها قلت امش وافتح غرفته واشغل المكيف وانسدح على السرير وشوي الرجال معاد له حس احركه اقلبه احط اذني على قلبة ماش الرجال ماتحرك ولا له وادق على جاري وهو شخص يعمل في مستشفى وجاني يركض ودقيت على الاسعاف جاري جلس يسوي له انعاش قلبي ومادري وش يقول المهم جا الاسعاف بعد عشر دقايق وجلسو يسعفونه ويحاولون يفتحون فمه ماقدرو لين جابو حاجة مثل المعلقة وحطو فيها انبوب وشالوة وعلى المستشفى ولحقتهم ويوم دخلت المستشفى قالو الرجال سوينا له انعاش قلبي وارسلناه لمستشفى الشميسي رحت لمستشفى الشميسي يااخوان شفت العجب عندهم مبنى كبير من 6 طوابق كله من اسباب التدخين والله ياجماعة ماكنت متوقع هالعدد من الناس بسبب التدخين حبيسين المستشفى بسبب التدخين المهم قالي الدكتور صاحبك حصل له مرتين توقف في القلب وشرايينه كلها مقفلة ولازم نسوي له عملية ويبي له جهاز مايوجد الا في مدينة الملك فهد الطبية لازم نحولة والدكتور قال تعال ابيك في موضوع بعد ماتخلص المهم ودينا الرجال وتنوم وقررو له عملية قلت بروح لدكتور اكيد فية شي خطير ودخلت علية في مكتبه قال ماودي اشغلك ولاكن اشوف انك شخص مدخن لاكن انا انصحك بتركه قامت ركبي تراقص ياخوان والله العظيم المهم قال تعال بوريك لفة في المبنى حق القلب وشفت العجب العجاب والله لدرجة اني بكيت من الى شفته ويوم خلص قال تعال بخليك تشوف عملية قلب قلت لا يادكتور اقسم بعزة جلال الله معاد اطبة وفعلا اول ماركبت السيارة رميت البكت وكنت خايف من الى شفته رحت البيت دايخ ومصدوم جلست تقريبا حوالي 12 ساعة ما اشتهيت ادخن نهائي جا وقت النوم وبصراحة اقولكم عانيت بشدة ولاكن رحت لصيدلية وقلت اعطيني حبوب نكوتين لاني كلمت شخص ترك التدخين ودلني عليها المهم اكلت حبة ويالله نمت صحيت من النوم اول ماقمت متعود اخذ زقارة ماش تذكرت المناظر الى شفتها امس وقمت اصلي وادعي يارب فكني منه واكلت من حبوب النكوتين والحمد لله خفت الرغبة وقمت اشرب من عصير البرتقال عدى ثاني يوم وجيت للمعاناه وقت النوم ماقدرت بصراحة المهم اشتريت دخان ولعت الزقارة وصكيت باب الغرفة ولعت الزقارة وخليتها تعجعج في الغرفة لين تخدرت ونمت على ريحتها ثالث يوم صحيت واول ماصحيت مسكت البكت وفي الزبالة وانشغلت بنفسي واكثر من السوائل حسيت راسي خفيف ثالث يوم سبحان الله خفت رغبتي عن التدخين بثالث يوم لدرجة كبيرة ورميت حبوب النكوتين وعدى اول شهر وانا الجمد لله حسيت بتغيرات كثيرة ولله الحمد اول شهر كنت المس جيوبي ادور الولاعة والبكت واذا جيت اطلع من البيت اتحسس جيوبي اباخذها واتذكر اني بطلت خلال الشهر الثاني ولله الحمد تغير لون وجهي كان اول اسود مايمدي اطلع الدرج اول الا اتعب واحس قلبي عند راسي والان الحمد لله راحت كل هذى المهم صاحبنا السواق ولله الحمد تعالج ولاكن للاسف الدكتور يقول الرجال تعبان جدا لازم تسفرونه وجلس عندنا حوالي الشهر وسفرناه وعطيته مكافاه اقلاعي عن التدخين الى ماكنت اتصور يوم ولا بلاحلام اني اتركه وتعايشت مع هالواقع والتسويف وبكرة وبكرة لين ما تماديت كثير بحق صحتي واهلى ....
انا سردت قصتى لكي يتعض غيري وانا هنا لمساعدة كل شخص يريد الاقلاع عن التدخين بنصائح والدعم النفسي للمدخن المقلع
لان المدخن يريد ان يدق عندة جرس يقول له قف انت تماديت والموضوع هذا باذن الله يكون جرس لكل شخص تمادى بحق نفسه وبحق اهله
الدكتور رحب بي وبكل شخص يريد الاقلاع عن التدخين ويريد ان ياخذ جولة ويقول ان جوالاته مع نجحت في اقلاع 80 % من كل شخص قام بزيارة خاطفة على قسم القلب بمستشفى الشميسي واسال الله ان يوفقه على حرصه
معليش كتبت الموضوع على عجالة وبدون تنسيق والتعبير لكم عليه لاكن ان شاء الله ان الفكرة وصلت للاعضاء وارجو ان نتساعد ليقلع كل شخص يريد ذالك
المواضيع المتشابهه 
تجمع اعضاء المنتدى لمساعدة اخواننا المدخنين للأقلاع عن التدخين 
العرض الشجري
