اشوف علومنا هالايام ارتفع البترول نزل البترول وكأن هذا الامر يعني للهوامير
شي بينما هو مجرد عذر لممارسة الإرهاب في الاسهم من بوابات التقيه والشماعات
لنبتعد عنهم شوي ونعيش اجواء شبت النار الصبح بدري
والدله وريحة هيالها
الدلــه ان كان مـا
سويتهـا بــــدري
بعد الضحى يالمعـزب ماهي شفاقـه
واللي جــرا لو علمت انـه يبا يجري
من موتـري جبت دله وسط عـلاقـه
وسويت لي دلـــة ٍمـادمت مقتـــدري
ماش احلا من دلة ٍتجي على فـاقــه
اخير من مجلسي من حـزة الفجــري
حتى شعاع الضحى بين مع الطاقـه
كني كبيـــر ٍ ومجبــور ٍعلى خـــدري
زل الضحى والخدر مافكـوا رواقــه
يسمع حساس العرب ولا لهم عذري
الا الــردا اللي عليهــم لاوي ٍ ساقـه
ما كن في ما مضى لـه قيمه وقـدري
يتعب على شانهم والغفوه سـراقـه
نديمــه اليــوم هبـايـــب ذارٍ يـــذري
يـذري على هيكل ٍ مـاعــادله طاقــه
ما لدّ له من يقول وش انت ياعـذري
وش عاد يادمعتن في لحظة افراقه
جيت العرب وثرهم ماهم على خبري
الضيف ماينبغى ولا شوفه شفاقـــه
كل ٍ ورا اللقمــه امـدوبــح ويجــري
زود ٍ على ماملك إيــدوّر الحـاقـه
حصيلهــم دوبهــم ولا لهم خشــري
جيل ٍ يبا الطيب لكن البخـل عــاقـــه
مرحوم ياللي حصيله خبزة الجمري
وإلا نسيـّــه قليلـه أو شِخب نــاقـــه
لاشاف ضيف ٍلفى فز فزت مقتـدري
ورحب تراحيب إرجال للطيب عشّاقه
والحال لـو كان فيـه قـل ٍ وعســــري
راعي حجـاج ٍ طليق ونفـسٍ رقـاقــه
مرحـوم يـاوقتنـا وتـاريخنـا الهجري
ومرحـوم يـاجيــل ٍ زينتــه اخـلاقـــه