يسولف علي احد الشيبان بموقف صار عليه
يقول عام 1397هـ تقريبا اشتغلت في شركة الكهرباء بالقصيم واهلي بدوا
في عالية نجد وأضطريت اسكن عند واحد من جماعتي في طرف الرس في مزرعه
وكنت اشتغل بالنهار والليل انام عنده
وفي يوم من الايام جيت من الدوام ولم اجده
قالوا
فلان منوّم بالمستشفى وذهبت مباشره لزيارته
وبعد إنتهاء الزيارة
قالي روح للعرب ونم عندهم البيت بيتك ولكن استحيت
مافيه الا حريم وورعان
فقلت لا انا ابي ارافق معك فوافق
وطلب من المسئولين فوافقوا فجلسنا الى بعد العشاء وجاء وقت النوم
ثم اعلن المستشفى حالة الطوارئ وطلب من جميع المرافقين مغادرة المستشفى فوراً ماندري وش السالفه
يقول
طلعنا الى الخارج كان عددنا قليل
والوقت شتاء
علينا برد مع غبار جمده والحالة في ذلك الوقت بسيطه لايوجد فنادق وشقق مفروشه
كان مستشفي الرس منعزل عن المباني
يقول بعض المرافقين معه سياره ونام بالمواقف
اما انا ذهبت على رجلي للسوق ولكن لم اجد احد الجميع قد اغلق محله وخلد للنوم تلفّت يمين يسار لعلي اجد مكان دافئ انام فيه ولم اجد
يقول في ذلك الوقت حتى الاناره ضعيفه وعلينا غبار وبرد والحاله حاله
وعندما ضاقت علي قررت العوده للمستشفى
لكن وجدت البوابه مغلقه فذهبت لباب اخر لعلي اجد لو زاويه انام فيها من شدة التعب والبرد يقول الوقت تقريبا منتصف الليل الآن على بال مارحت ورجعت من السوق
فتسللت من الخلف وفتحت الباب الا انا اشوف ناس نايمين رجال ونساء واطفال جنب بعض والاضاءة ضعيفه في ذلك المكان يقول كان اللي يليني منهم رجل عليه طرف بطانيه والطرف الثاني مافيه احد أمعنت النضر فيه الا هاك الخيّر اللي لحيته كبيره قلت خلني ارقد جنبه فرفعت طرف البطانيه الآخر وكان معطيني ظهره وزحفت نحوه حتى لامس ظهري ظهره فلم. يقولي شي قلت بس هذا ابن حلال ومن شدّة التعب والسهر نمت على طول
يقول
اثر الموضوع صاير حادث شنيع على باص حجاج والمستشفى لايوجد به ثلاجات موتى في ذلك الوقت والاشخاص اللي نمت معهم متوفين كانوا بإنتظار سيارات الموتى تنقلهم الى بريده
ولم تصل الا
قبل الفجر
يقول انا لما دخلوا العمال عشان يشيلون الموتى سمعت الاصوات زي الحلم ماصحيت الا واحد يرفع عني البطانيه وأول مافتحت عيني شفت ساق وقدم الرجال اللي جنبي مقطوعه ومحطوطه بحضنه منظر مرعب وفي نفس الوقت العامل صاح ويقول كلام وهو
ينتفض مافيه موت مافيه موت
وانا مادري وش انافيه من شدة الرهبة
اطلقت ساقي للريح والعمال وراي يكبرون ويتحمدون الله ويطردوني العمال والاطباء والمرضى اللي يقدرون وانا يوم شفت العالم كلها تطردني انهبلت المهم ساعة مطارده يقول هم يحسبوني مغمى علي بالحادث وحييت ويبون يطمئنون علي يحسبوني انجنيت وانا احسب صاير حرب ويبغون يذبحوني واغلب المطارده كانت بالظلام
يقول بعد ماتعبت تمكنوا العمال من الامساك بي على بعد كيلو من المستشفى المهم يقول جابوا النقاله وهم يقولون لي الحمدلله على السلامه وانا مادري وش السالفه وتجمع الاطباء يفحصون جسمي وانا اتململ يحسبون فيني شيء
ومدير المستشفى وكبار المسئولين حاضرين والناس ماعاد هم يمي اثاريهم يحققون بيعرفون من الطبيب اللي كشف وقرر اني ميت المهم يقول راحوا يعدون الموتى
لقوا العدد زايد المهم يقول بعدها قرروا يسألوني وقلت انا مرافق طردوني من المستشفى بالليل ولقيت الناس نايمين ونمت معهم فضحكوا حتى المرضى من قصتي
المواضيع المتشابهه 
قصه قديمه 
العرض الشجري
