أحد الأيام ، وبعد صلاة العصر .. طقيت على ابو جيراننا ، وسلمت عليه ( وكنت ذيك الفترة بالجامعة ) ..
جارنا استغرب من سلامي ، وقال : سم آمر يا أحمد ؟
قلت : ابد الله يسلمك ، ودي اكلمك بكلمة راس .. اذا تسمح ..
قال : تفضل .. آمر ..
قلت : وش رايك نقلط ببيتك ؟
قال : .... طيب ... طيب .. تفضل ..
المهم .. يقول اننا دخلنا وتقهوينا .. وجارنا منسبه ( متفاجئ ) .. وش يبي ذا ؟؟
قلت : والله يا ابو فلان .. انا بصراحة طالب ايد بنتك فلانة ..
قال : نعم ؟؟ طيب يا وليدي .. وين ابوك ؟ امك .؟ اهلك ؟ اخوانك ؟؟ يعني المسألة لازم يكون لها مقدمات .. موب بس طقها والحقها ..
قلت : والله يا ابو فلان .. انا اللي ابتزوج ولا هم ؟ ، اذا انت راضي بي وبأخلاقي .. فخلاص .. الموضوع منتهي ( حجره )
قال : والله انك ونعم .. بس ..
قلت : ولا بس ولا شيء .. اذا انت موافق .. شف البنت هي موافقة ولا لأ .. وخلاص .. ينتهي الموضوع
قال : طيب يا وليدي .. عطنا يومين ثلاثة ايام .. اشوف البنت واشاوره .. ويصير خير ان شاء الله ..
قلت : ولا ثلاث ايام .. ولا يحزنون .. المسألة بسيطة .. تروح الحين للبنت وتقول له : وش رايك بفلان يتزوجك .. موافقة ولا لأ ؟ .. اذا موافقة خلاص .. مو موافقة .. الحمد لله .. المسألة سهلة جداً ..
قال : طيب طيب .. ابشر .. ابشوف البنت شوي وارجع لك ان شاء الله ..
الأب دخل شوي .. ورجع وهو يقول : ماشاء الله تبارك الله .. مبروك مبروك يا وليدي .. البنت موافقة ،
خوينا : الله يبارك فيك ..
قال ابو البنت : خلاص يا وليدي .. كلم اهلك وبشرهم .. وخلهم يجون عشان تكون الخطبة رسمية .. ونحدد بعدها الملكة والزواج و و و و ..
قال خوينا : لا لا لا لا .. الحين باقي ساعة على المغرب .. اقمز الله لا يهينك لسوق الغنم .. وشف لك اطرف ذبيحة .. واقمز للطباخ واجدعه عنده .. وانا من هنا ابروح اكلم اهلي .. واواعد الشيخ المغرب .. نملّك المغرب ان شاء الله .. وعقب العشاء نعزم الجيران ونتعشى .. والبنت ان شاء الله الليلة تنام عندي بالبيت ..
ابو البنت : سلامات ؟؟
قال خوينا : الله يسلمك .. يالله يا خال .. مافيه وقت ..
وطلع الرجال من هنا .. واتصل على شيخ لعقد القران .. وواعده المغرب .. ودخل على اهله وهو مبسوط
اليوم زواجي يا جماعة .. اللي بيحضر الله يحييه ببيت آل فلان ..
اهله :
ابوه ، واحد اخوانه .. عارفين الرجال .. فصدقوه .. وجهزوا ملابسهم .. وراحوا معه .. اما بعض اخوانه الثانين فما صدقوا الوضع ابداً .. !!
المغرب .. ملكوا ..
العشاء .. تزوجوا ..
تمّ الزواج بحمد الله ، والآن عندهم ولدين ، و 6 بنات .. زواجهم له اكثر من 17 سنة ..
المواضيع المتشابهه 
خطبة . ملكة . زواج بخمس ساعات فقط ..!! 
العرض العادي
