الأميرة والشاعرة/ مها الأحمد السديري
« غيوض » اسم غني عن التعريف
تعود للساحه الشعريه بمرثية
في زوجها الأمير الراحل / نايف بن عبدالعزيز
العام يا أم سعود كان الحزن ضيف
واليوم دق أوتاده الحزن فينا
الحزن غيمة غيبت نجمة الصيف
و باسباب جوره يا جواهر شكينا
غاب الحبيب وﻻ بقى للهنا طيف
و اﻵه يا نورة تهاوت علينا
كن الظهر يا سعود فيه انغمد سيف
و الصدر صار لكل الاوجاع مينا
قول يا محمد متى فارق و كيف
اصيح يا سارة متى هو بيجينا
يا نوف من عقبه ترى بسمتي زيف
جف الفرح من حولنا و انطفينا
أبوك يا نواف ماله تواصيف
و انشد مشاعل كان مثله لقينا
و الكون يا هيفاء بلا ظله مخيف
اعذر بكانا يا فهد لو بكينا
كان القمر كان البحر و المجاديف
كان الحنان اللي بحضنه دفينا
و كان الملاذ لشاكي الضيم و الحيف
كم شال عنا كم خذا عن يدينا
عاش و رحل كله مهابه و تشريف
جار الحرم فوق الحكي و ان حكينا
والله لو كان المقدر على الكيف
ما غبت يا نايف وﻻ احنا ظمينا
كل ما رخيت الجفن جدت عواصيف
و الشوق ثار و فارقتني السكينه
و شفتك مثل شمس بروس المشاريف
نورك يناديني و انا اقول وينه
و ألقاك و اصحى و ألمحك راقي النيف
حي ولو صلت عليك المدينه
أحسك بجواي ماهي تخاريف
يا ساكن عيون المهاة الحزينه
في ذا جلسنا بين صمت و سواليف
و في ذا الممر اثنينا كم مشينا
و في هالزوايا كم جمعنا مواليف
و ياما على ذيك المرايا ضوينا
عشرة عمر ما تنتهي بالصواديف
و ذكرى تبي تحيا ولو ما بقينا
الموت يا نايف كتاب و تصاريف
و حنا بحكم اللي خلقنا رضينا
المواضيع المتشابهه 
مــــــــرثية الأميــرة مهـــا الســديــري الله يطول بعـــمرها في حياة المرحـوم نايـف 
العرض الشجري
